Á laugardag fyrir hvítasunnu, 3. júní 2006, var Hótel Flatey - gisting og veitingastofa - opnað með pompi og prakt. Hátt á annað hundrað manns mætti í opnunarhófið,- allir sem í eynni voru og vettlingi gátu valdið. Ljósmyndirnar tóku þeir Haukur Már Haraldsson og Guðmundur Páll Ólafsson.

Eyjamatur
Á boðstólum var m.a. grafin lúða, reyktur svartfugl, blinis með laxi og kavíar, smábökur og hjónabandssæla sem gestir skoluðu niður ljúfum veigum.

Blóm og blús
Sveitarstjórinn á Reykhólum, Einar Örn Thorlacius færði aðstandendum Hótels Flateyjar blómakörfu og flutti stutt ávarp, Nicholas Blin ávarpaði gesti f.h. Plássins ehf, hljómsveitin Bræðrabandið (Ingólfur Steinsson og Lárus Grímsson) lék og um kvöldið var slegið upp balli að gömlum Flateyjarsið.

Gluggabar...
Í blíðviðrinu og mannþrönginni var gott að fá áfyllingu á veigarnar út um gluggann á barnum.

Hótelstýrurnar
Ingibjörg Pétursdóttir og Ingunn Jakobsdóttir stýra rekstri Hótels Flateyjar og veitingastaðarins í Samkomuhúsinu í sumar. Mynd hér að neðan sýnir þær á tali við Jóhannes Gíslason, bónda í Skáleyjum í opnunarteitinu.